Super Junior ミ 13eyond Your Imagination

- الاسم الحقيقي : بارك جونغ سو ..
- تاريخ الميلاد : 1 يوليو 1983
- طوله 178 و وزنه 59 ..
- يقول انه لما كان في الثانوي قالوا لهم اذا تبغون تدخلون الجامعه لازم تكونون موهوبين في شي معين مثل الرقص فراح الاستاذ هو و شلته و سووا فريق رقص ,, 8)
فشافه واحد وقام نصحه يدخل اختبار الاداء عشان موهبته . ;)
- لما ترسموا سوبر جونيور جونغ سو طلع باسم ليتوك [ ايتوك ] كاسم شهره له و معناه "المميز" و بما انه الكبير صار هو الليدر للفرقة ..
- ايتوك له تاريخ اسود في قيادة السيارات و لو قال يعرف يسوق زين فهو من جنبها و مره اشتركوا في برنامج يركبون فيه سيارة و يحاولون يوقفونها او يمرون من اماكن عشان تطلع مواهبهم .. ما يحتاج نقول انه فشل في اغلب المواقف اللي واجهته في البرنامج ..
- ايتوك و اينيوك لهم برنامج راديو خاص فيهم اسمه سوكيرا كيس ذا راديو يستضيفون فيه فنانين و يستقبلون رسائل المستمعين ..
- قريب مره من دونغهي و يعتبره اخوه الصغير للابد .. و السبب انه ابو دونغهي قبل ما يموت وصاه عليه و قال له انا اثق فيك عشان كذا ابغاك تعتني بولدي ..
- هو اللي يصحي الاعضاء كل يوم عشان جداولهم لكن مع انه هو اللي يصحيهم يقولون عنه انه هو اكسلهم و اذا نام يطفشون و هم يصحونه و اذا راحوا لصالون يجلس يحوس يدور على مكان ينام فيه ..
- هيتشول يقول انه كان معاه في غرفة وحده زمان و كان لما يجي يصحيه يتعب معاه لدرجه اوقات يضربه و ايتوك ولا استجابه .. و يقول لما يصحى من النوم يروح قدام المرايه و يجلس يزبط في شعره ولا كانه متأخر ولا كانه سوا شي ..
- اعطوه لقب انجيل يعني ملاك لانه انولد في يوم ممطر و يقال انه وصل من السماء .. طبعا الكلام ذا كله خرابيط فانز لانه ولو كان ليدر و انجيل فهو انسان في النهاية ..
- ايتوك معروف بشخصيته المرحه و كلامه الكثير و نكته البايخه اللي تضحك العالم غصب .. و معروف بضحكته و شخصيته اللطيفه و دموعه ..
- في ابريل عام 2007 ايتوك تعرض لحادثه سير هو و اينيوك و كيوهيون و شيندونغ .. و كان هو ثاني اسوأ متضرر من هذا الحادث و سووا له 170 غرزة في ظهره ..
- مهووس باللون الابيض لدرجه انه كل دولابه و غرفته لازم فيها هذا اللون .. و يقول ما ارتاح لو ما لبست شي ابيض حتى لو لبسه مافي يدخل فيه هذا اللون مثل ساعه بيضا .. :affraid:
- يعتبر مقدم جيد للبرامج بسبب قدرته على الكلام و التواصل مع الضيوف و سرعة بديهته .. شارك في تقديم الكثير من برامج الموسيقى هو و اعضاء الفرقة مثل كانغن و شيندونغ
و اوقات تلاحظون انه يقط في التقديم حتى لو كان ضيف ..
- عضو في فرقتين فرعية للسوجو و هي Super Junior T و Super Junior Happy ..
- عنده رقصه شهيره عنه يحب يؤديها و هي اذا جا يقدم عن نفسه يدق رجوله بالارض و يلف جسمه و يقول تيكي تيكيييي
- يعيش الحين في شقة سوبر جونيور اللي في الدور العلوي و يتقاسم هو و دونغهي الغرفه ..
- قبل الديبوت كان بيصير في فرقة من 5 افراد و كان من بينهم دونغهي بس تغيرت الخطط و انضم لسوبر جونيور لما تكونت ..
- ايتوك عنده اخت اكبر منه طلعت معاه في كم برنامج مثل Introducing Star's Friend ...
- دايم يعطي انطباع بانه اكبر مرجوج في الفرقه لكن اذا جينا للصدق هو قائد رائع و ينتبه على الاعضاء و يقلب جدي في اوقات الجد ..
- تيكي يتكلم عن كيف صاروا سوبر جونيور فيقول انهم قبل التدريب طلعوا في تمشيه جماعيه لكل المتدربين في الشركه .. و بدأوا يعرضون مواهبهم فشافهم المدير و قال لهم انتوا عندكم مواهب متعدده و جمعهم و صاروا سوبر جونيور ..
- قبل عدة شهور ايتوك طلع بشي جديد اسمه "Milk Club" و تكلم عنه في الـCyworld حقه .. ملخصه انه نادي سواه عشان للناس اللي يبكون بسرعه و يخفون حزنهم و اللي عندهم مشاكل انضم للنادي تيوون و يوونا من سنسد و اونيو من شايني و يووتشون من دبسك .. الفانز سووا دوشه عليه و قاموا يقلقون و يكبرون السالفة بس طلع النادي كله لمجرد المزاح بس ..
- تيكي عليه حركات دلع احيانا و حركات جذب انتباه .. و يمكن لـMilk Club و حده من ذي الحركات .. :oops:
يحب يشكي للعالم و يقول لهم قد ايش هو تعبان و قد ايش يعاني .. و يقولون مره ترك لصقه جروح على يده يومين عشان يقول للفانز انه اخذ ابره !!
- في حياة كل فنان لازم تصير اغلاط و فضايح و دنيا و تيكي مو استثناء منهم .. اول غلط جا بدون قصد منه في احد البرامج لما قال انه Kim Yuna و هي بطلة تزلج رفضت دعوه ارسلها لها في الـCyworld .. هو ما حسب حساب الفانز المتعصبين اللي هاجموا صفحه بطلة التزلج و ارسلوا لها مئات رسايل الانتقاد و الكره .. بس تدارك الوضع و نزل اعتذار قال فيه انه ما كان يقصد الا انه يخلي البرنامج اكثر تشويقاً ..
الغلط الثاني انه في احد برامج الموسيقى و اثناء ما فرقة Davichi كانوا يلقون خطاب بعد فوزهم بالمركز الاول تيكي كان واقف ورا Kang Min Kyung و ظهر على وجهه تعبير اشمئزاز بعد ما قرب منها .. العالم كله قال انه سوى كذا عشان البنت رائحتها مو كويسه و هاجموها و استنكروا منها .. بس بعدها بفتره برنامج Kiss The Radio استضافوا الفرقة و البنت تكلمت و سألت تيكي عن اللي سواه .. هو قال انه صحيح شكلي يعطي انطباع اني شميت منها شي لكن في الواقع اللي شميته كان رائحه الثلج المجفف اللي استخدموه على الستيج ..
- يعاني من مشكله انه يتعب كثير ولا ياخذ كفايته من النوم .. و كم مره يغمى عليه اثناء التصوير او التدريب .. قبل الترسيم هيتشول كتب في صفحته انتري طويله عن تيكي و قال فيها انه تيكي اغمى عليه من التعب و انه اخذ غفوه و هم ينتظرون السيارة تاخذهم نهايه اليوم و هيتشول كان خايف تيكي يطيح فدعمه بيدينه(https://2img.net/h/oi46.tinypic.com/2rmbm95.jpg) و قال انه هو و تيكي الاخوه الكبار للباقين و هم اللي يتحملون المسئولية لكن تيكي هو الاخ الاكبر الوحيد لهيتشول ..

- اسمه الصيني Hangeng
- تاريخ الميلاد: 9 فبراير 1984
- هواياته: فنون القتال, الرقص, الباليه
- عضو في super junior M
- ليدر super junior M
- في 2002 نجح في اختبار الاداء لشركة اس ام
- الوحيد اللي اختاروه من 3000 متقدم للاختبار في الصين :affraid:
- يوم عرف انه انقبل كمتدرب ترك عائلته وانتقل لوحده في كوريا
- عائلته كانت فقيره جدا فسافر من غير فلوس واستعمل الـ traveller's visa
- ما كان يتكلم او يفهم اللغة الكورية اول ما وصل لكوريا ..
- بعد سنتين من التدريب انضم للفرقة المؤقته super junior05 مع 11 عضو كوري :suspect:
- بعد كم شهر من ترسيمهم وبعد ما لاقوا شهره في كوريا صارت له مشكله مع الفيزا
- كان فيه قانون يحد الاجانب انهم يظهرون على 3 قنوات بس وكانت الاس ام ما تعرف هذا الشيء لانه هان كان اول اجنبي يترسم في كوريا
- عرف بهذا الشي بعد عرض في Mnet وانه ما راح يقدر يطلع عالمسرح مره ثانيه الا بعد ما يحل مشكلة الفيزا
-"عندما سمعت بهذا كنت في طريقي الى مقر الشركة, احسست انهم قتلوني قبل ان ابدأ"
-"كنت ممنوعا من المشاركة في العروض, ماذا استطيع ان افعل, لقد بكيت كثيرا "
- قالوا لهان انه لو طلعت عالتلفزيون قبل ما تحل مشكلة الفيزا بتدفع غرامه ويمكن توصل لانه ينطرد من كوريا ..
- ولانه هان كان يبغى يساعد فرقته وخصوصا انه كان له دور كبير في الرقص في الاغنية اقترح عليهم انه يلبس قناع وعشان الناس ما يتعرفون عليه من ستايل شعره لبس قبعه كمان.
- هان استمر يلبس القناع لمدة شهرين او ثلاثة وكان يظهر كباك اب دانسر والاعضاء الباقين يغنون مقاطعه في الاغنية ..
- حاول الاعضاء انه يواسونه ويخففون عنه بس كان في هذيك الفتره مره حزين
- بعد مده هيتشول وصلت معه وبعد ما انتهوا من الاغنية دف هان لمقدمة المسرح يبغاه يرقص قدام بس هان كان خايف وحاول انه يرجع قام هيتشول سحبه وشال عن وجهه القناع وقال له لا تخاف
- وبعدها بفتره انحلت المشكله ورجع يطلع في كل القنوات وفي 2008 اتلغى قانون القنوات الثلاث
- مع انه صار يتكلم الكوريه بطلاقة بس تجيه حالت ما يفهم اللي ينقال له ..
- في مقابله كان بيقول عن هيتشول انه مو من هذا العالم وانه انسان مختلف ويمدح نفسه وما يفكر بغيره طبعا هذا بعد الترجمه لانه كان كلامه مو مفهوم لدرجه انه المذيع قال له انت لازم تروح تدرس اللغه من جديد ..
- دايما يغلط في نطق الكلمات وانواع التريقات اللي تجيه من الاعضاء وخصوصا هيتشول اللي ما يترك اي فرصه الا ويقلده ويتريق عليه ..
- مره هيتشول قال في مقابله باقلد هان فقال له هان اسكت لا تتكلم, عصب هيتشول وقال لو ما تكلمت انا مين بيفهمهم كلامك
- مره نيكول اللي في كارا تسأله متى جيت لكوريا قال لها تشا (سياره او نايم) سنوات فقالت له قصدك سا (اربعة) قام سالها انت كم لك في كوريا قالت 3 سنوات فتحطم لانها لها اقل منه متعلمة وصايره احسن منه هنا
- نفس الشي في فول هاوس اول ما قدموا انفسهم لانيا وايفا كانت ايفا تصلح له كلامه وهي متعلمه كوري في فتره اقصر منه ..
- كان لما يغلط بالكلام يقول عشاني اجنبي فيقوم هيتشول ويخبطه ويقول لا خلاص انت صرت كوري الحين ..
- هان يعرف ستايلات رقص كثيره ومنها الرقصات الصينيه التقليديه اللي عددها 56 ..
- بالفلوس اللي جمعها من شغله اشترى مطعم لامه في الصين ودايما يرسل لهم فلوس ..
- بتصويت الـ ELF الصين اختارت هان كحامل للشعلة في اولمبياد 2008 في الصين ..
- يقول فيه 3 انواع للمعجبات الكوريات. الاول مره هادي وما عنده كلمات كثيره بس يقولون ثلاث كلمات اوبا اوبا اوبا. النوع الثاني يقول اوبا هذي انا هذي انا (كأنه بيتذكرهم). الثالث بس يصرخ ويقول اوبا سارانغهي.
- في مقابله مع امه قالت انه دايما يقول لها: امي هذا اللي اسويه كله عشانك, عشان تعيشين حياة احسن ..






- اسمه الحقيقي : كيم جونغ وون
- مواليد سنة 1984 , أغسطس
- اسمه المسرحي : يسونغ ومعناه " فن الصوت "
- عضو في Super junior Happy , KRY.
- يسونغ كان ولد من بيته لمدرسته ويحب الغناء جداً ويحلم يكون مغني لكن لان بلدته بعيدة عن سيول كان فاقد الامل.
دائما مايشغل الموسيقى ويجلس يغني في بيتهم وامه هي الداعم الاول له تقول له " أنت افضل من كل اللي بالتلفاز "
- شارك في مسابقات غنائية وربح المراكز الاولى ومن بعدها سجلته امه بتجربة الاداء عن طريق الانترنت .
وسافر لسيول مع امه ونجح بالتجربة وانضم لشركة SM الترفيهيه , عشان كذا دائما مايشكر امه في البرامج
- اول اغنية للسوبر جونير TWINS لما كانوا يغنونها لايف دائما لما يجي مقطع يسونغ يأخذون الصورة من بعيد ولا يقربون عليه :x
وكان منقهر من هالشي يبي يطلع بالشاشه , بعد ثلاث اسابيع اخيراً قربوا عليه وطلع بالتلفزيون وكلمته امه بعدالعرض تبكي تقوله " اخيراً ظهرت على التلفاز"
- يسونغ نقدر نسميه صاحب الحظ السئ , دائماً يحب يتكلم في البرامج ويتفاعل بس حظه دائماً سئ ومقاطعه دائماً ما تقطع , ولما يجي يتفرج يكتشف ان مقطعه حذف ,
لدرجة انه مره بكى في برنامج ع الراديو لما طفش من البرامج الي تحذف مشاهده
- يحب انه يتكلم فتشوفونه بالبرامج لما يسالونه يسونغ وش رايك بكذا وكذا ؟ يرد " أه أخيراً جاء دوري "
- معروف بيدينه الصغاار وراسه الكبير , واعضاء السوبر جونير يضربون بكبر راسه المثل , وفي كل برنامج يجيبون سيرة راسه الكبير ,
لكن يسونغ يقول ان راسي صغير بس عشان قصة الشعر تخليه يصير كبير
- على ان يديه صغار الا انه قووي في لعبة مصارعة الاذرع , وإينيوك دائماً مايتعجب وشلون يفوز عليه وهاذي يده !!
- الاعضاء يقولون مستحيل ينزل يسونغ للشارع او السوبر ماركت بدون مايضبط ويسشور شعره , حتى لو مشوار صغير للسوبر ماركت لازم يأخرهم ويسشور شعره
- في برنامج Come to Play أجمعوا الاعضاء على ان يسونغ شخص غريب الاطوار وينافس هيتشول على هاللقب
- من حركاته الغريبه انه لما يكون في رحلة ماينام في غرفة وحدة .. كل عشرين دقيقة يروح ينام عند عضو وبعدها يغير وينام عند غيره :pale:
- لما صار الحادث المعروف لاعضاء السوجو واللي تضرر فيه تيكي وكيوهيون وشيندونغ وإينيوك ,
يسونغ ارسل لهم رساله في الردايو وكان يبكي https://www.youtube.com/watch?v=qtVJrraXl9g
- كان يغار من هيتشول وقطته اللي يلعب معها في الشقه اللي فوق شقتهم ..وكان يقول "لازم أشتري لي قطه عشان مااكون وحيد واطفش " لكن انتهى به الحال بسلحفاة مو قطه , :D
ومسميها " البطاطا الحلوة الصغيرة " لكن لانها سلحفاة ما استفاد شي الا انه يشيلها ويطالع فيها وهي تفتح عيونها وتغمضها
.. وصار يقول " كنت أعتقد قبل اني طفشان لكن اللحين بموت من الطفش "
- يسونغ له نصيب الاسد من الاصابات من بين السوبر جونير , في بداياتهم كانوا مشاركين في مارثون وفي نص المارثون طاح يسونغ واحتاج لنقل للمستشفى
ولا قدر يكمل معهم المارثون ورجع في النهايه بعكازته ,
وعلى ايام اغنية بيجاما بارتي وقت التدريبات على المسرح طاح يسونغ من على المسرح ونقل للمستشفى ومنعه المدير من المشاركة مع الاعضاء .
- يندمج بالرقص لدرجة انه يطلع عن الرقص المألوف وقت ماهو يرقص , ويحاول يقلد إينيوك بس النتيجة تكون شي غريب لا ينتمي للرقص https://2img.net/h/oi49.tinypic.com/344pe9h.gif و https://2img.net/h/oi48.tinypic.com/ojdswo.gif وhttps://2img.net/h/i30.photobucket.com/albums/c331/___ohdangerr/1194621744_sjtv_ys1.gif
- يعرف يقلد الاعضاء ببراعه , حتى حركات الوجه يضبطها 8)
- في برنامج EHB يسونغ كان خبل بكل معنى للكلمة , https://2img.net/h/i520.photobucket.com/albums/w325/lovesujuelf/17.gif

- اسمه : لي دونغهي
- مواليد : 15 أكتوبر 1986
- كان حلمه يكون رياضي ولكن كان حلم والده بأن يصير مغني , فحاول دونغهي يحقق حلم ابوه ويصير مغني
- كان يشوف BoA تغني وترقص بالتلفزيون وهي بنفس عمره , فقال ليه هي تغني وترقص انا بعد اقدر اكون مثلها ,و سافر لسيول وتقدم للشركة
- تقدم لشركة sm في عام 2001 كمشارك في مسابقة اوسم مراهق وفاز فيها بالمركز الاول , وبنفس السنة بدأ بدروس الرقص والغناء والتمثيل
- اسمه دونغهي ويعني East Sea عشان كذا يلقب نفسه بـ Fishy أو King of Fish
- أيام التدريب كان من ضمن فرقة مكونة من خمس شباب من ضمنهم إيتوك
- وفي 2004 تم ضمه لفرقة جديدة من 11 شاب تحت مسمى Super Junior05
- قبل ما يترسمون جونسو وإينيوك قالوا له أنك لما تصير مشهور بتتغير وبتشوف حالك ولا عاد بتعرفنا .. طلع بسرعة من عندهم وبعد فترة دخل عليه إينيوك وكان يبكي وضربه وقال له " أنا مابتغير "
- اينيوك قال مره إن دونغهي هو الوحيد اللي ماتغير من قبل ايام الترسيم لازال يشتغل بحماس مثل قبل وانه هو اللي يحمس الباقين على الشغل
- يحب يشوف الافلام خصوصاً الاجنبيه وأكثر افلام يحبها ويحس ان لها معنى , Titanic & a walk to Remember
- يحب اهله كثير ويفقدهم ودائماً مايقدر ينام لان باله ينشغل بالتفكير فيهم ودائماً مايبكي لما يكلمهم بالتلفون .
- يحب الاطفال والكلاب كثييير .. ويتمنى يصير اب بسرعة لانه يبي يهتم بأطفاله
- شكله يظهره بأنه شخص بارد ولكنه في الحقيقة شخص حساس
- ايام التدريب كان مقرب جداً ليونو من دبسك وهيتشول .. وعاشوا الثلاثة مع بعض في فترة من الفترات .
- يذكر اعياد ميلاد اصحابه كلهم ويحرص انه يعايدهم , وغالباً مايحدث صفحته بالـ Cyworld لكن لما يكون عيد ميلاد لاصحابه ينزل صورة ويكتب تهنئة لهم .
- لما كان والده مريض ودخل المستشفى سافر على طول عشان يشوفه وبعد ما استلموا اول جائزه لهم كان تعليقه " ابي , أتمنى أن تكون بصحة جيدة "
- يحب لما الناس يسمونه Prince
- مقرب جداً من إينيوك و يحب يلعب معه و لما يكونون مع بعض يتحولون لاطفال
- إينهيوك و دونغهي " EunHae " ولكن عشان مايزعل شيوون اخترع لقب جديد وسماه " EunSiHae " لان شيون بنفس عمرهم
- في برنامج Come to Play صدم الكل لما قلد روتين شيوون اليومي , حافظ كل حركاته حتى الاعضاء ضحكوا من تقليده
- يقول أن يده مصيبه تمشي وتخرب الاشياء , كل شي يلمسه يخرب أو ينكسر , استخدم لاب توب شيندونغ اللي شراه من ثلاث ايام وخرب , واستخدم لاب توب ريووك وخرب وضاعت كل الملفات الموسيقية اللي الفها .. عشان كذا الاعضاء دائماً يقولون له لاتلمس الاشياء
وهو يقول لو ان هالاغراض لي ما اهتميت اشتريها متى ما احتاجها بس اكثر مايضايقه انه يخرب اشياء اصحابه .
- يحب يلبس تيشرتات شيندونغ لما يبي ينام عشانها وسيعه 8)
- كيوهيون اصغر اعضاء الفرقه يقول عنه " دونغهي طفل بعمر 5 سنوات "
- في برنامج يقدمونه شايني استضافوه هو وسانغمين وسالوهم من الافضل كشكل في السوبر جونير فقال سانغمين انه من التوب 5 من بين اعضاء السوبر جونير , و سالوا دونغهي , قال بكل ثقه انه الاكثر وسامة في SM كلها هنا
- فتاة احلامه , البنت اللي تهتم به لانه دائماً مايشعر بالوحدة يحتاج لمن يهتم به
- يفتقد لمهارة الكلام وتعجبه ردود " إيتوك , هيتشول , كانغن و شيندونغ " ولما يردون فجأءة ينلخم ويقول وااااااااو .. :o
- إيتوك يقول اول ماترسمنا قلت له " سوبر جونير نجحوا لانك موجود فيها " فقال له دونغهي " لا نجحنا لان هيونغ معنا " رد إيتوك " ايه اعرف " فتنح دونغهي وقال وااااااااااااااو :o
- حادثة وفاة ابوه كانت صدمة قوويه عليه , ولما توفى ابوه اختفى دونغهي عن السوبر جونير لفترة , ولما أصحابه السوبر جونير تورت غنوا مع مطرب ابوه المفضل ماقدر يشوفهم وطلع وراح يبكي لحاله
- ابوه قبل يتوفى كان عارف انه مريض فوصى إيتوك على دونغهي , إيتوك يقول للحين أتذكر ابو دونغهي وهم ماسك يدي ويقول لي اهتم بدونغهي
- دائماً ما يتذكر ابوه في لحظات فوزه بالجائزة , يقول كل الاعضاء يكلمون اهلهم مبسوطين وأنا أتذكر ابي
- إيتوك ودونغهي مقربين لبعض جداً لما سافر دونغهي للصين عشان يروجون لالبوم Super Junior M ,
كتب إيتوك في صفحته بانه اشتاق لدونغهي جداً وكتب كيف ان دونغهي لما يرجع دونغهي من اعماله ينادي في كل مكان هيونغ هيونغ .. ووقت النوم يجي يقول بنام جنبك .. ولما يعصب عليه تيكي يقول له بوجه حزين "هيونغ انا بروح للصين واذا رحت بتكون وحيد "
- هيتشول تكلم عن دونغهي مره في صفحته الخاصه وقال انه هو الدونسينغ المفضل عنده
وقال دونغهي هو الشخص اللي ممكن يتكلم ويسبني ويقول عني " كيم هيتشول %$#:@*، " وما أعصب منه بالعكس اضحك عليه ومع الاخرين اعصب وليه وليه وممكن اضربهم دونغهي هو الشخص الوحيد المسموح له بأنه يدخل علي وأنا أستحم <~ لا بالله مميزآت
دونغهي هو الشخص الوحيد يصحيني متى مايبي ولو استلزم الامر يضربني عشان اصحى ولو صحيت قبله عادي اضربه عشان اصحيه , بإختصار دونغهي من بين الاعضاء هو الوحيد اللي لما اقول في البرامج شخصيتي كذا وكذا ولا أسمح بأن أحد يكلمني بصفه غير محترمه ويزعجني . دونغهي هو الوحيد اللي بإمكانه يزعجني ويكلمني بغير احترام وينفذ مني بدون عقاب .




- تاريخ الميلاد الرسمي: 10 فبراير 1987
- تاريخ الميلاد الحقيقي: 7 ابريل 1986
- يغني, يرقص, يمثل, عازف طبول
- عضو في Super Junior M
- اهله كانوا رافضين انه يدخل في هذا المجال لكن وافقوا انه يوقع عقد مع SM بس ابوه قال انه ما عاد بيساعده
- شيوون هو الجنتلمان المثالي و مره سألوا كيوهيون في برنامج راديو مين الجنتلمان في سوبر جونيور فقال شيوون هنا
- دايما يستعمل يدينه في التعبير بادب لما يتكلم ودايما الاعضاء ومذيعين البرامج يقلدونه ((CTP - EHB))
-الحركات اللي يسويها بيدينه كثيره وكل وحده لما معنى, لما يرفض بشده, يرفض بادب, او يكون محرج, كل شي له حركه ولما ما يستعمل يدينه, يستعمل حواجبه .. :o
- الفانز يسمونه Shibrows (دمج اسمه مع كلمة حواجب)
- شيوون اكثر واحد جدي في شغله وتحسونه اعقل واحد فيهم
- شيندونغ يقول عنه انه كل يوم في الصباح لما يروح الصالون ياخذ black coffee ويحط رجل على رجل ويقرأ له كتاب او الانجيل :o
- ودونقهي يحكي عن يوم في حياة شيوون, لما يصحى من النوم ويغير ملابسه يغيرها كانه يمثل في فلم ويرمي الملابس في سلة الغسيل كانه يرمي كرة سلة , وعنده سلة لوحده لانه ما يحب احد يشاركه في ملابسه, بعدين يسوي له فطور وقهوه ويقعد يقرا الجريد, والجريده امريكيه كمان وبعدين يروح الجيم يتمرن ويرجع البيت ويفتح الراديو ويسمع موسيقى الجاز
- بالاضافه للغناء شيوون ممثل وعارض
- يعرف يعزف على الطبول ومره عزف لـ The Trax لما كان عازفهم مو موجود
- انشهر اكثر لما مثل في دراما تاريخية صينيه "Battle of wits" عام 2006
- اكثر واحد يحب الـ skin-ship ويحب يحضن الاعضاء كثير
- هيتشول يقول صار يطفشني.. قلت له اذا عندك وقت تحضني روح دور لك صديقه واحضنها, المشكله انه يسوي نفسه جنتلمان وخجول قدام البنات بس اول ما تروح البنت يصير كيوت ويقول هيونغ بوبو! (قبلـه) << مريــض
- كانغين يقول ما كنا نشوف بعض كثير يوم كانوا في الصين فلما يرجع ما يصافحه ويقوله هيونغ اشتقت لك, لا يحضني ويسلم على خدي, كنت احس انه عاطفي بزياده, وكل ما اقابله على هذي الحاله, الحين صار الوضع ينرفز .
وهيتشول يقول انه عنده نقص في الحب.
- يقول عن نقطة ضعفه انه نادرا ما يكون راضي عن شغله ويحس انه فيه شي ناقص
- مسيحي وايمانه بالرب قوي
- الفانز يسمونه Shisus (دمج اسمه مع المسيح)
- دايما يحاول يدعوا هيتشول انه يؤمن ويصير يروح للكنيسه
- في Mistery6 يحكي لهيتشول عن قصه انهم كانوا في كنيسه يصلون وواحد طاح فجأه وصار يقول انت سويت كذه فيني بصوت عميق مره ,فجاء الكاهن وصلى له وشفي على طول
فقال هيتشول: يعني في النهايه تبغى تقول لي اروح الكنيسه واؤمن بالرب
شيوون: اذا آمنت بالرب بتعيش حياه سعيده
هيتشول: يعني انا الحين حياتي تعيسه ؟ انا ملعون
شيوون مسكين تورط وحاول يلم السالفه ويقول انا ما قلت كذه
- يتعلم اللغه الصينيه ويتكلم مع هان بالصيني وهان يرد عليه بالكوري عشان يحسنون لغتهم

/][/url]

- اسمه : كيم ريو ووك .. و يسمونه ريووك او ووكي ..
- تاريخ ميلاده هو 21 يونيو 1987 و هو طالب في جامعة Inha في قسم الدراما و السينما ..
- ريووك هو اخر عنقود عايلة السوجو و يسمونه Eternal Magnea و لو انه مو اصغر واحد في العمر لانه بعده كيبوم و كيوهيون و هنري .. :oops:
لكن الكثير يقولون انه شخصيته مناسبة جدا انه يكون اخر العنقود ..
- اكثر عضو فيهم يملك موهبة في الغناء و الكل يشهد له بصوته المميز حتى في غنائهم لايف
- يحب الغناء و التلحين و اوقات كتابة كلمات الاغاني و هو اللي كتب كلمات اغاني المقدمة لبرامج كانغن و يسونغ على الراديو
- يحب يعزف على البيانو و مره طلع في برنامج سوبر شو و هو رايح يتعلم العزف عليه و الحين يقدر يعزف عليه بشكل جيد ..
- ريووك جدا خجول في البرامج و ما يتكلم كثير و سريع التأثر لدرجه لما احتاجوا يجمعون دموع في برنامج EHB
رشحوه يكون واحد من اكثر اثنين يبكون في الفرقة و بالفعل بمقلب بسيط مؤثر ما قدر يمسك دموعه و بكى عليهم
- عنده هواية عجيبة و هي انه يحب يجمع عينات المكياج اللي توزع مجانا في المحلات
- له سالفة مع المكياج يحكيها اعضاء السوجو في برنامج .. يقولون انه ريووك حتى لو راح و قابل اهله لازم يحط ميك اب
الاعضاء قاموا يسلكون له و يقولون انه ما يحط عشان اهله بس انه ما يقابل اهله الا في الايام اللي يكون حاط فيها من قبل يقابلهم
بعدين قال انه بشرته خربت من الميك اب فهو خايف انه اهله يقلقون عليه و يحزنون لو شافوا بشرته المعدومه
- كانغن ماسك عليه شغله و يقول انه مره جدولهم تأجل لليوم اللي بعد فقام دق على كيوهيون و ريووك و قال لهم اطلعوا معاي يقول كيوهيون خرج و هو لابس كاب و شكله عادي بس ريووك خرج له و هو ما مسح الكحل حتى
- عنده خال او شامه على خده اليمين و ما تبان لانه يحط ميك اب دايم
- يعتبرونه امهم في البيت لانه يعتني فيهم و اول ما يشوف واحد فيهم تعبان يروح يطبخ له اكل و دايم يذكرهم انهم يهتمون بانفسهم و يزعل اذا ما اكلوا اللي طبخه لهم
- مره صارت لريووك حادثة وهم يغنون Miracle اثبتت فيها انه بروفيشنال و عرف كيف يتصرف و الحادثه انه اثناء الرقص جزمته انخلعت و صارت على ارضية الستيج , و بما انهم جدد وقتها كان المتوقع انه يرتبك و يلخبط الرقص لكنه كمل عادي لما جاته فرصه يشيلها
- يقولون انه ثاني اكثر عضو ودي و غير متحفظ في الفرقة من بعد كانغن , يعني لا يغركم خجله و قلة كلامه
- مشترك في فرقتين فرعيتين للسوجو و هي Super Junior M .. اللي نشاطها في الصين , و Super Junior KRY اللي تضم افضل اصوات السوجو ..
- يحب النوم و ما عنده اي مانع انه ينام 18 ساعه في اليوم .. و مره طلعوا فوقه اكثر من واحد عشان يصحونه و هو لسا نايم 8)https://www.youtube.com/watch?v=1qhELYbUHa0
- قبل الديبوت كان متين و وزنه وصل الى 80 كيلو .. لكن مع التدريب نقص وزنه 25 كيلو و صار بالشكل اللي نشوفه الحين ..
- عنده طريقة كيوت و تقليدية لما يعرف نفسه و يقول : "ريووك اميدااا" بمعنى "انا ريووك" و اوقات الاعضاء يقلدونه و هو يقولها https://www.youtube.com/watch?v=XVm7aroK_kg&feature=related
- في برنامج اشترك فيه سوبر جونيور و كان اسمه Animal Farm اختار فيها ريووك كلب من الملجأ عشان يربيه بس للاسف كان الكلب مريض و قرر يعتني فيه
الكلب بعد ايام مات و ريووك تأثر من ذا الشي بعدها و بكى
- معجب كبير لفرقة SNSD او Girl's Generation و يحب يسمع لهم و كمان عضو في فان كلوب لفرقة SES اللي منها بادا ..
- ريووك صدم الفانز بتمثيله في فيلم سوبر جونيور لانه كان عكس شخصيته الخجوله و قام بدور طالب مثالي لدرجه الاستفزاز https://www.youtube.com/watch?v=e7qIi2jhZAo
- يقال انه الدونغسينغ المفضل لدونغهي و انه مره قريب منه



- اسمه : كيم كيبوم
- مواليد عام 1987 في شهر اغسطس ..
- مغني في سوبر جونيور و احد مغني الراب في الفرقة و ممثل و راقص كمان ..
- بدايته الفنية كانت في التمثيل و طلع في دراما April Kiss عام 2004 قبل ما ينضم و يترسم مع سوبر جونيور ..
- ولد عمه هو الممثل و العارض المشهور شين دونغ ووك ..
- هو احسن واحد في سوبر جونيور يتكلم انجليزي و السبب انه كان ساكن كم سنه و درس هناك 8)
- هو من اصدقاء هيتشول المقربين و مثل معاه في درامات عديده منها Rainbow Romance و Banolim #2
- هيتشول اعطاه لقب سنوايت ضمن عدة القاب من ديزني اطلقها على اصحابه ..
- في فول هاوس كيم جونغ مين كان يقول انه كيبوم يشبه له خاصه لما يبتسم و قال عن ابتسامته انها Die Smile و كان قصده Killer Smile
- بما انه ابتسامته مميزه فدايم الاعضاء و خاصه هيتشول يقلدونه https://www.youtube.com/watch?v=ikwWZH9SWVE
- كان يعيش هو و هيتشول و هانكيونغ و جاي احد اعضاء تراكس في شقة صغيره تبعد دقيقتين عن شقة السوجو الاصلية ..
- بعد تغيير المسكن صار كيبوم يعيش برا الشقتين اللي يسكنون فيها سوبر جونيور و اللي تقع في الدورين 11 و 12 من بناية سكنية 8)
- هو ثاني اصغر عضو في سوبر جونيور في العمر و اصغر عضو هو كيوهيون
- ذكي مره و معدل ذكاءه هو 138 و عرضوا النتيجه هذي في برنامج Happy Sunday Heroine 6
- كيبوم متوقف حاليا عن الانضمام لنشاطات الفرقة بسبب انشغاله في التصوير لدرامات او اعلانات لكن الاعضاء الباقين دايم يذكرون الفانز انهم ما يزعلون من كيبوم وانهم يدعمونه في اللي يسويه لانه ما زال من سوبر جونيور ..

- الاسم : تشو كيوهيون ..
- تاريخ الميلاد : 3 فبراير 1988
- هو العضو الثالث عشر اللي انضم للفرقة بعد مده من ترسيمهم و قبل احتفالهم باكمال 200 يوم و هو الاصغر بينهم
- اول ظهور له معاهم كان في اغنيتهم U و مافاته كثير اذا حسبتوا انه دخل معاهم بعد Twins و Miracle ..
- قبل ينضم كيوهيون للفرقة كانت الفرقه مجرد مشروع الشركه جمعت فيه ممثلين و مقدمين و مغنين و كونت فرقة مؤقته
و قالوا انهم كل سنه راح يتخرج ناس من هالفرقة و يبدلونهم بناس جدد لكن بعد دخوله الاس ام غيرت رأيها و خلتهم فرقة رسمية
- يعتبر صوته من اقوى و اجمل الاصوات اللي موجوده في سوبر جونيور فعشان كذا انضم للفرقة الفرعية KRY
- يمكن البعض يشوفونه هادي و ما يتكلم في البرامج لكن يطلع من تحت راسه هوايل و اللي يقرأ ردوده على الفانز بيلاحظ
نقدر نقول عليه انه هادي و عاقل لكنه في نفس الوقت حذق و ساخر و لسانه طويل ..

معجبه : ما اقدر انام ..
ريووك : ما تقدرين تنامين .. ؟
معجبه : اي ما اقدر انام ..
كيوهيون : طيب وش دخلني انا اذا ما تقدرين تنامين
,’,
معجبه : اوبا .. انت غبي ! :o
كيوهيون : بالمقارنه بك انا عبقري
,’,
معجبه : كيوهيون هو اوسم رجل في العالم .. 8)
كيوهيون : اعرف

- بما انه كيوهيون الاصغر في الفرقة فهو "أدلع" واحد فيهم و يقول انه اذا حس بتعب دايم يلاقيهم قدامه يعتنون فيه و يقولون له ارتاح و بما انه الاصغر كمان فهو دايم يطلع لنا الجانب اللعوب من شخصيته و يقدر يمزح على الاعضاء الاكبر سنا بدون ما يتعاقب :pirat:
- مدمن العاب الكترونيه و الكل يعرف بهذا , لدرجه اطلقوا عليه لقب : GameKyu لانه كل ما يلعب مع احد من الاعضاء يفوز عليهم .. :pirat:
و اوقات يجيب لابتوبه و يكمل لعب في غرفة الانتظار و تبديل الملابس ..
- كانغن يحكي عنه و يقول مره وصلت البيت في وقت متأخر و الكل نايم و فجاه اسمع واحد يصارخ يوم دخلت الغرفه لقيت كيوهيون متحمس
و داخل جو مع لعبته و حتى ما طالع فيا يوم كلمته , كيوهيون دافع عن نفسه و قال انه كان يلعب لعبه مهمه :x
- كيوهيون جلس فتره من دون سرير و كان يحسب انه السبب لانه اصغر واحد في الفرقة مع انه الاعضاء قالوا له انه السبب مو كذا , :o
وفي يوم قام يغني اغنيه Bed Song على برنامج و فيه فانز كثير كانوا بيشترون له سرير عشان هالاغنيه لكن في النهايه حصل على سرير و قدر يدخله في مساحه ضيقه بين ريووك و تيكي
- 19 ابريل عام 2007 يوم ما راح ينساه فانز سوبر جونيور ابدا , لانه اليوم اللي وقعت فيه فاجعة حادث السير اللي تعرض له 5 من اعضاء سوبر جونيور
اثناء عودتهم من برنامج راديو , و في هذا الحادث كانت حالة كيوهيون و اصابته هي الاخطر و الاقوى لانه كان جالس ورا السائق
- الاعضاء و الفانز كلهم اصيبوا برعب لانه كيوهيون ظل فاقد للوعي فتره و قالوا انه اصيب اصابة شديده في الرئتين و كسور في الحوض و الاضلاع و جروح عميقة
- الاطباء قالوا عنه انه يفوق و يغمى عليه مرارا , و انه في الاشعه اللي سووها له الرئتين كان لونها ابيض و الحالة الطبيعية انها اسود
- في ذا الوقت الكل كانوا قلقانين عليه لانه حالته جدا خطيره و الامل كان شبه معدوم .. فكانوا يدعون له و كثير منهم كتب في صفحاته
- يسونغ سجل مقطع صوتي له و هو يبكي و يرسل رساله لكيوهون انه يستعيد صحته , و قال له انه ان شاء الله لو قمت بالسلامه و رجعت تتريق علينا في البرامج ما راح نزعل منك ولا نخاصمك
- ربي نزل رحمته على الولد و افاق من غيبوبته لكن لما صحي ما قدر يتكلم من الصدمه , بعد شهر قدر يمشي على رجوله و في يوم 5 يوليو 2007 قدر يطلع من المستشفى
- صحيح انه ما تشافى كليا وقتها لكن كيوهيون اصر بعد خروجه انه يرجع للشغل و انه يشترك في الالبوم الجديد لسوبر جونيور
- اينيوك كان يقول انه تأثر جدا بشي سووه الفانز لكيوهيون .. و هو انهم لما راحوا الدريم كونسرت جابوا لوحه كبيييرة فيها صورته و كان مكتوب عليها "كيوهيون .. هل انت تشاهد الآن ؟" و اينيوك راح يبكي لما شاف اللوحه
- في برنامج Star King واول مارجع كيوهيون من بعد اصابته , اختارته بنت فلبينيه يغني معها من بين اعضاء السوجو
تيكي بكى وهو يشوف كيوهيون يغني مع البنت وكانغن كان يمسح دموعه
تيكي قال " أنه كان من الاشخاص اللي صار لهم الحادث مع كيوهيون وانه سعيد جداً بانه يشوف كيوهيون يغني وانه بيغني معاه في السوبر جونير "
- انضم للفرفة الفرعية في الصين و هي Super Junior M
- يقولون انه كيوهيون لهجته الصينية مره حلوه و صار بعض كلامه مشهور بين الفانز في الصين
‫-‬ في برنامج صيني كان جومي يغني وصوته خرب لما كان يغني نوته عاليه وكيوهيون ما قدر يمسك نفسه من الضحك 8)

شركة SM قررت انه تكون فرق فرعية من اعضاء سوبر جونيور لعدة اسباب ..
منها انه لما يكون عددهم اقل في الفرقه كل عضو ياخذ حقه في الغناء ..
وسبب ثاني انه بعض الاعضاء يكونون مشغولين بالتمثيل او تقديم برامج
و ما تتوقف نشاطات الفرقه بسببهم .



اول فرقه فرعيه كانت KRY ، وتكونت في ٢٠٠٦.
تضم افضل الاصوات في سوبر جونيور: كيوهيون، ريووك، يسونغ
نوع الاغاني اللي مختصين فيها هي الـ Ballad و الـ RNB و اول ظهور لهم كان على Music Core في ٥ نوفمبر ٢٠٠٦ ..
وغنوا The One I Love .
شاركوا في الـOST لدراما Hyena بثلاث اغاني منها اغنية الثيم الرئيسي للمسلسل.
و شاركوا كمان في OST دراما Snow Flower وBilly Jean Look at Me‪ ‬ ..
هي الفرقه الفرعية الوحيده اللي ما نزلت البوم او سينغل وكانوا بس يشاركون في البومات مشتركه مع فنانين و في OST الدرامات .
فيه اشاعات انه بيرجعون بس ما تأكد شيء للآن .



ثاني فرقه كانت Super Junior ‪-‬ T والـ T يرمز لـ Trot اللي هو نوع قديم من الاغاني الكورية .
اعضاء الفرقه هم: ليتوك، هيتشول، كانغ ان، سنغمين، شيندونغ، اينيوك
نزلوا البوم واحد بس Rukuko وكان فيه ٣ اغاني Rokuko‪,‬ First Express‪ "Chut Cha", Don't Go Away ‬
قبل ما الفرقه تصير رسميه بـ٣ شهور غنوا Don't Go Away مع دونغهي في MKMF 2006 وكان هيتشول لسا ما شفي بعد الحادث ..
واول ظهور لهم كفرقة فرعية كان في ٢٥ فبراير ٢٠٠٧ على برنامج SBS Popular Songs وغنوا Rukuko و First Express مع مغنية التروت الشهيره Bang Shilyi , وكان اول عرض بعد عودة هيتشول من بعد الحادث.
بعد شهرين من نشاطات الفرقه ليتوك، شيندونغ و اينيوك صار لهم حادث سيارة وتكنسلت نشاطاتهم لمدة شهرين.
ورجعوا في يونيو واستمروا شهر وبعدها توقفوا وللحين ما رجعوا مع انه فيه اشاعات كثيره انهم بينزلون اغنيه جديده بس للحين ما تأكد الخبر
شاركوا في برنامج Idol World في ٨ حلقات وانعرض من ٥ مايو الى ٣٠ يونيو .
وفي ٨ نوفمبر ٢٠٠٨ نزلوا النسخه اليابانيه من اغنية Rukuko مع الثنائي الكوميدي Moeyan
و وصلت الاغنية للمركز الثاني في الـOricon Chart ..



قررت الشركه انها توسع نطاق عمل سوبر جونيور في الصين في عام 2007 .. فاصدرت قرار انها راح تسوي فرقة فرعية للسوجو
الفرقة مكونة من 5 اعضاء من سوبر جونيور و هم : هانكيونغ - شيوون - كيوهيون - دونغهي - ريووك
اضافة الى اثنين من المتدربين الصينيين في شركة SM و هم عازف الكمان هنري الصيني اللي كان عايش في كندا ..
و جومي ( زومي ) اللي كان يقدم برامج مسابقات و يكتب كلمات اغاني قبل انضمامه للفريق ..

كان اسم الفرقة المبدئي هو Super Junior China و لكن الشركة اعلنت وقت الترسيم انه الاسم راح يكون Super Junior M
و يقال انه حرف الـM في الاسم يشير الى كلمات و معاني عديدة منها :
Mandarin و تعني اللغة الصينية الشمالية و المقصد انه الفرقة تبغى توسع نشاطها في السوق الصيني ..
Me و هو اسم البوم الترسيم حقهم ..
Mi و اللي هي كلمة صينية لها معنيين و هي كاريزما و جمهور ..
و المقصد انه الفرقة تبغى تتقرب اكثر من جمهورها في الصين ..
ترسمت الفرقة في الصين يوم 8 ابريل عام 2008 و في نفس اليوم طلع اول كليب لهم و هو U
نشاطاتها الى الان مستمره و سووا لهم Comeback قبل فتره بسيطه بكليب جديد و منفرد لهم و هو Super Girl

في شغله مهمة تجي على البال كل ما انذكر اسم Super Junior M و هي الخلاف اللي صار بداية ترسيمهم .
او الحملة اللي قاموا فيها جمهور سوبر جونيور و سموها Only 13 ..
و راح نتكلم عنها اكثر لما نتكلم عن الفان كلوب ..



رابع فرقة فرعية من سوبر جونيور وتتكون من ٦ اعضاء: ليتوك، كانغ ان، يسونغ، سنغمين، شيندونغ، اينيوك
يعني نفس Super junior-T بس بدال هيتشول حطوا يسونغ .
نوعية اغانيهم من الايقاع السريع و Dance and Pop music .
اول عرض لهم قبل ما تصير الفرقه رسميه كان في ٣ مايو ٢٠٠٨ في Power Concert .
وفي ٣٠ مايو اعلنت الشركة عن الفرقة، و اول اغنية لهم Cooking‪?‬ Cooking‪!‬ انعرضت في نفس اليوم.
و اول عرض لايف لهم كان في Dream Concert 2008 .
ثاني اغنية لهم هي Pajama Party وانعرضت في ٤ اغسطس ٢٠٠٨.
كانوا مذيعين برنامج Idol Army Season 1 على قناة MBC

ككل فريق غنائي اخر سوبر جونيور عندهم قاعدة جماهيرية كبيرة تتوزع في جميع بلدان العالم و ليس كوريا فقط ..
و كعادة عالم الفن الكوري اللي يحتم على كل جمهور انهم يختارون لون او شعار و اسم لهم حتى يميزهم عن الباقين ..
جماهير سوبر جونيور صار اسمهم E.L.F و هي الحروف الاولى من جملة Ever Lasting Friend .
اما الشعار فهو البالونات اللي لونها ازرق داكن او ..Pearl Sapphire Blue
The Seas Of Pearl Sapphire Blue ☆彡

جماهير السوجو جدا داعمين للفرقة لدرجه انهم هددوا بمقاطعة الشركة عشان حملة Only 13 ..
و الحملة هذي قامت لما تكونت فرقة Super Junior M و قالوا انه راح يدخل عضو جديد من خارج سوبر جونيور ..
الجماهير اعترضوا و قالوا انهم ما يبغون يزيدون ولا ينقصون ولا يقسمون في سوبر جونيور ..
بعد فتره من اعتراضهم قام مجموعه كبيره منهم عددهم فوق الـ400 بمظاهره صامته قدام مبنى الشركه ..
و كانوا يحملون لوحات تعترض على اضافة العضو الجديد و هو هنري الى سوبر جونيور ..

بعد المظاهره الصامته اللي شكلها ما فادت تجمع حوالي الالف شخص قدام المبنى و ما اكتفوا بالصمت !!
لكنهم غنوا اغاني للسوبر جونيور و رددوا كلمة "13" مرارا و تكراراً ..
لكن الشركه رجعت و اعلنت انها بتضيف عضو اخر و هو جومي الى الفرقة مما زاد غضب الفانز عليها و قرروا يغيرون طريقة اعتراضهم
و قام الاف الفانز حول العالم بشراء حصه كبيره من اسهم الشركه و هددوا بتسبيب خسائر للشركه لو ما وقفت عن اللي تسويه ..



القضية انتهت في 1000days fanmeeting لما تيكي قال انه ما كان يعرف اش يرد على سؤال الناس لهم : كم عدد اعضاء سوبر جونيور ؟
و قال انه بعد الاشياء اللي صارت و اللي سووها الفانز هو و الاعضاء قرروا انهم يجاوبون على السؤال بـ 13 ..
و انه شاكر لجميع جماهير السوجو اللي وقفوا معاهم و دعموهم و انهم راح يحمون السوجو مع بعض لسنوات عديده قادمه ..
اما كانغن كتب في لوحه انه [ سوبر جونيور اعضاءه يبدأون بـ"ليتوك" و ينتهون بـ"كيوهيون" ] و عرضها على الشاشه في برنامج راديو ..
و الحين الجماهير تقبلوا العضوين الجدد كاعضاء لفرقة Super Junior M فقط و صاروا يدعمونهم و كثير منهم قالوا انه سوبر جونيور 13 لكن عائلة السوبر هي 15 ..




https://www.youtube.com/watch?v=5zEpTedoak8&feature=related

اينيوك و هيتشول وكانغ ان يقلدون حركات ليتوك
...
https://www.youtube.com/watch?v=cBsmIudjx94

كانغ ان و ليتوك يقلدون سانغمين اذا شاف بنوته حلوه
...
https://www.youtube.com/watch?v=4Q1DDOpej1o

حتى ريووك ماخلا منهم كيوهيون و سانغمين يقلدونه في اغنيه Red Sun
...
https://www.youtube.com/watch?v=JkjF6xQThTk

ييسونغ مستلم اعضاء السوجو تقليد (خاصة تعابير فيساتهم ) ..
...
https://www.youtube.com/watch?v=4HvLc4g20rc

و دونغهي يتفلحن في الصين و يقلد طريقة عزف هنري على الكمان ..
...
https://www.youtube.com/watch?v=ikwWZH9SWVE

https://www.youtube.com/watch?v=-tOfsZzJxjc

هيتشول ملك التقليد :king: يقلد ضحكه كيبوم



تعبتوا من القراءه ؟؟ عيالنا كثير و قشهم اكثر ؟؟
صار بالامكان انكم تحطون الرحال الحين بما اننا وصلنا لنهاية الموضوع ..
ان شاء الله انكم طلعتوا باكثر من معلومه و ضحكتوا على اكثر من شي لسوبر جونيور ..
ان شاء الله انكم ضحكتوا على التوائم و بكيتوا مع هانكيونغ و تفاعلتوا مع قضية الاونلي 13 ..
حاولنا قدر الامكان انه ذا الموضوع يكون موسوعة شاملة تشمل جميع المعلومات اللي لازم تنعرف عنهم ..
كان تحدي بالنسبه لنا اننا نخلص هالتقرير بسرعه و على قول البنات " تقرير سوبر جونيور يحتاج سنتين على ما يخلص " !!

- فيشي .. صاحبة الفكره و رئيسه المشروع و المحرك الفعلي و الداعم لكل شي كنا نسويه .. كمساميدا
- بلاك .. العامل الابداعي للمشروع بكتابة الموضوع ومشاركة الافكار والتصاميم والتنسيق .. كمساميدا
- ميما .. اللي سبقت الكل و بدأت كتابة الموضوع و خلصت شغلها و جلست تتفرج علينا .. كمساميدا
- تيكي .. ورتنا الدليل انه سوبر جونيور = ضحك + استهبال كمساميدا
شـكرآ مره ثآنيـه هذآ آلموضوع تنسيقي بس منقول لعيون السوجو

هههه .,~

لآ شـكر علـى وآجـب

وآنـآ آصلآ من عنـدي غيـركم يـآ آلآلف و آلسوجو علشآن آتعب عليكم

تستـآهلون كل شئ حلـو يآ آحلى فآنز بآلكون

الالف العرب احلى فآنز

يـآ رب تقبل منـهآ وآن شـآء آلله مـآ يفترقوون آبد

منوره قلبو